沙田馬場這天頭四場皆由大熱門馬勝出，第五場四班泥地一哩，原本都有機會係咁。可惜羅理雅策騎何良馬房2.0倍大熱「星光勇將」在全面性機會下，步步贏一步輸，觸線一刻俾內側次熱門雷神、容天鵬騎練組合的「電子鳳凰」影相氣走屈居亞軍，反為「電子鳳凰」133磅險勝鼻位，單Win及組合獨贏A1分別派 46.5及14元。
「星光勇將」及「電子鳳凰」可謂同馬唔同命，「星光勇將」由外號炒飯哥的羅理雅接手後炒唔出鑊氣，人馬合作兩戰都係第二，反為「電子鳳凰」季內由田泰安搏極都輸最叻第二，但今次一換雷神即贏，400萬身價五歲馬打破逾一年頭馬荒，同時成為繼第三場450萬「大道至公」後，這天第二匹勝出的本地拍賣馬。而雷神連同頭兩場憑何良「精彩時機」及蔡約翰「喜悅繽紛」所獲的兩Win，跑罷第五場火速中三元領先騎師王。
「電子鳳凰」馬主係養過一代馬王「電子麒麟」的盧榮民，本身亦係繼第二場「喜悅繽紛」及第四場「財寶家駒」後，這天第三匹勝出的1號133頂磅馬。
今場「電子鳳凰」搭亞軍「星光勇將」開出4.6倍大熱Q，第三名由後備補出馬「金龍」取得，第四名係因李寶利墮馬受傷而易配祈普敦的「千真萬確」，四重彩派二萬一千幾。