正所謂「雪中送炭」，英格蘭前鋒朗尼雖然今季喺曼聯狀態反反覆覆，不過暫代領隊修夫基都繼續委以重任，上周五世界盃外圍賽歐洲區F組對蘇格蘭嘅傳統大戰，以隊長身份出戰，英軍今場大勝3:0，朗尼雖然冇波入，都交出一個助攻，賽後佢都知恩圖報，力撐修夫基坐正做領隊添。
英格蘭對蘇格蘭喺1872年首次交手，係現代足球有統計嘅首次國家隊比賽，百幾年後兩隊孭住傳統球隊之名，但實力已經大不如前。英格蘭都算得上歐洲一線尾球隊，蘇格蘭更加自98世界盃後未嘗打入國際大賽決賽周！上周五呢場波雖然喺溫布萊呢個足球聖地上演，仲吸引八萬七千幾人入場觀戰，但競爭意味加上對抗性已經大不如前。
朗尼撐修夫基坐正
24分鐘英軍右閘基爾獲加傳中，史杜列治頭槌近頂，幫英軍先開紀錄。下半場英格蘭再由拉爾拉拿頭槌頂成2:0，今場踢足90分鐘嘅朗尼都唔執輸，喺61分鐘開出角球，中堅加利卡希爾又係用頭槌破網，英軍憑三個頭槌入球，以3:0大勝，自1975年大勝5:1後，對蘇格蘭最大勝仗。
朗尼繼幫曼聯3:1大勝史雲斯一戰後，再度交出助攻，以進攻中場位置嚟講都算唔錯，狀態好番後連講嘢都有說服力得多；朗尼賽後就話：「修夫基嚟到國家隊後，工作好出色，佢過去帶青年軍都好好，已經做足一切，我相信佢係坐正領隊嘅最佳人選，英格蘭足總應該知道點選擇。」講真修夫基領軍後，英格蘭都拎到兩勝一和，𠵱家以四戰三勝一和嘅成績排F組榜首，出線形勢都幾唔錯，英格蘭周二主場對西班牙，都只不過係友賽，競爭意味不大，英格蘭足總都有時間諗諗幾時畀張長約修夫基。
英警唔查大儍甩難
講開英格蘭領隊，點可以唔提因回佣事件閃電落台嘅「大儍」艾拿迪斯，英國警方已經宣佈唔對佢嘅回佣作刑事調查，佢可以重返英超做領隊，唔知佢又會唔會返新特蘭幫球隊救亡呢？