立法會之前否決用特權法查梁振英UGL事件同廉署人事風波，但其實28名民主派議員早前用呈請形式，成立專責委員會查UGL事件，只係冇得用特權法，點知建制派連呢個委員會都唔放過，想霸位阻民主派做嘢，搞到白鴿黨黃碧雲噚日喺內會同建制派開火。
其實內會噚日只係討論成立一個11人「籌備委員會」，用嚟討論專責委員會職權範圍同委員人數，咁黃碧雲就問，若然有興趣議員人數多過11人，究竟用抽籤定按建制、民主派比例決定人選？呢個時候內會主席李慧琼話，或者到時要投票決定，但建制議員人數比民主派多，投票決定即係建制派可以送晒自己人入去！
聽到呢度黃碧雲即刻話，建制一直反對成立委員會，如果大部份籌委由建制派做，咁仲查乜？點知張國均好坦白咁話，如果建制派想搶位，真係全部入晒都得！最終琼子打完場，話會同內會副主席郭榮鏗溝通，傾一個兩派接受方案喎。