立法會內會喺會期開始後，噚日首次可以開得成會，仲要極速於半小時內完成，內會主席「琼子」李慧琼，同副主席郭榮鏗終於飲得杯落，會後請議員食經常要排長龍先食到的Lady M蛋糕。琼子話，見到議員今個星期開會咁辛苦，所以同郭榮鏗一齊請大家食蛋糕，總共買咗70件，笑指價錢「四位數字梗要啦」，話希望內會嚟緊可以開得暢順啲。
「你想我老婆斬死我？」
郭榮鏗就話，只要議員「少講廢話」，日後就多啲蛋糕食。可惜話口未完，行過的建制派議員馬逢國，就笑同琼子合照的郭榮鏗係「影結婚相」，嚇到琼子即時話馬逢國「亂咁講嘢」，郭榮鏗亦話「你想我老婆斬死我呀？」
唔少議員都畀面食蛋糕，立法會主席梁君彥亦有親自叫長毛食。長毛就搞笑，話：「阿哥，你disqualify（取消）我食餅的資格，好驚呀！」梁君彥就話「你都會俾人嚇驚嘅咩？」長毛就笑說：「我姓梁，梁氏宗親會，你保保我呀」。