周四世盃外南美洲區矚目大戰，由巴西主場對阿根廷。雖然美斯親自出馬，但阿根廷都冇乜起色，最後吞咗巴西三隻光蛋，家陣排南美洲區嘅第六位，希望佢哋下場對哥倫比亞爭吓氣啦。至於美斯嘅巴塞隆拿隊友尼馬就威水，幫巴西入波又助攻，攻入個人第50個大國腳嘅入波。
尼馬國際賽入咗50球
踢波講團體合作，假如班隊友唔合作加埋教練又廢嘅話，就算多兩個美斯都冇用。阿根廷呢輪有美斯復出，配搭希古恩、迪馬利亞等攻堅，牌面唔曳，初段亦踢得唔差，但巴西嘅菲臘比古天奴喺25分鐘接應尼馬妙傳，禁區頂轟入炮彈式遠射得手，幫巴西先開紀錄。完上半場前尼馬單刀射入佢喺國家隊嘅第50球，幫巴西領先2:0返更衣室。
換邊後阿根廷教練保沙換入阿古路加強攻力，但未見其利先見其害，被荷西保連奴喺59分鐘射入，最後阿根廷作客輸0:3。美斯賽後承認，阿根廷今場波嘅問題係心理多於技術，「我哋嘅心理質素一定要更強，先至可以克服逆境波。我諗我哋又會俾人鬧，阿根廷球迷已經冇乜耐性。」阿根廷輸波後排第六位，美斯話：「雖然球隊走勢好差，但只要我哋之後做好自己，唔再失分，都可以晉級嘅。」佢哋下星期二會主場對哥倫比亞。另一位巴塞球星蘇亞雷斯就帶領烏拉圭主場以2:1贏咗厄瓜多爾，以23分排第二，落後榜首巴西一分。