自從梁振英做咗特首之後，佢從反面角度推動港獨真係不遺餘力，難怪贏得「港獨之父」嘅謔稱。其實佢備選特首嗰陣已經漸露雛形，5年前今日佢現身國民教育中心搞嘅國民教育講座，當日佢避談六四、批評香港嘅青年人「畫地為牢」，總之就不斷煽動香港人抗拒中國。
梁振英當日係咁講嘅，佢話唔少國家都喺學校開設國民教育科，教啲年輕人認同國家，不過香港自殖民時代至今都缺乏國民教育，令到啲港青「畫地為牢，守住深圳河以南」。相信當時嘅人聽到呢番說話，只會覺得梁振英政治正確，但諗深一層，佢之後藉住強推國教，觸發一片反國教風潮，學民思潮都係靠呢單嘢響朵。
唔單止咁，一講到國教包唔包括六四事件時，梁振英就含糊其辭，只係好籠統咁話，中國有幾千年歷史，無論古今都有唔少令人不安嘅事件，應該用平常心探討，接納中國嘅優點同缺點。相信八方話港獨令北京同建制派不安無錯啩，點解梁振英又唔用平常心探討呢？佢接住仲話，內地不斷進步，香港可以起示範作用，「國家越落後，越需要我哋」。其實香港本來有好多優點，的確可以示範畀內地睇，可惜呢啲優點全部敗喺梁振英手上。