創仔上市總令人嘩嘩聲，因為創仔多數係全配售，圍晒飛，一掛牌就爆升幾倍至幾十倍。喺澳門經營夜場Club Cubic嘅陸慶娛樂（8052）今日掛牌，佢搵到韓國男團BigBang成員之中年紀最細嘅勝利令市場嘩多兩聲，可惜，聽聞勝利今朝唔會出席公司上市儀式，粉絲唔使諗太多了。
陸慶主要喺澳門路氹新濠天地入面，經營夜場會所Club Cubic，好似話勝利喺Club Cubic表演過，公司上市就搵到佢做基礎投資者。佢投資312萬元，以招股價0.21元計，佢獲得1,461萬股，等於持股0.8%。即管睇吓呢隻股爆升幾多，令勝利身家一日爆漲幾多喇。