黎芷珊自家眼鏡品牌Luisa Leitao噚日喺會展眼鏡展擺攤位，佢嘅舊愛張達倫前日結婚，都專程嚟撐場，但係黎芷珊就缺席佢嘅婚禮。
黎芷珊解釋話：「因為噚日忙搞攤位，所以去唔到，今日一見到佢即刻恭喜同送上祝福，之後再補請佢兩公婆食飯，仲可以一世贊助張達倫眼鏡。」至於張達倫就十分畀面，專登度期嚟撐場，到場時仲係宿醉未醒，酒氣未消，佢話：「希望月尾可以同太太去日本度蜜月。」咁會唔會順便造人？張達倫話：「計劃出年先，盡快啦。」
杏兒孕味濃尷尬
講到造人，人妻胡杏兒日前慶祝生日，好友祝福語似有弦外之音，杏兒否認有喜：「冇呀，唔知點解咁傳，真係冇，有一定同大家講，我仲有一個內地劇要開，畀大家講到我都好心急，如果有咗就喺屋企做女王唔使做，有人斟茶遞水啦，我都好期待但唔係。」杏兒話最快要明年初完成內地劇之後，先可以小休，𠵱家都冇特別進補：「冇補都俾人話有孕味，好尷尬，總之自己會努力，遲啲會主動問吓陳敏之、鍾嘉欣、陳豪等等，請教吓生小朋友秘方，歡迎大家畀意見。」
撰文：馮仁昭