吳國敬麥玲玲拉頭馬!沈集成包辦900蚊孖寶

吳國敬麥玲玲拉頭馬!
沈集成包辦900蚊孖寶

上季快活谷首席練馬師係沈集成,今季則暫時以方嘉柏贏谷戰次數最多。沈集成似乎唔甘心俾方嘉柏搶去呢個牌頭,這晚快活谷頭場由羅理雅勝出「泡泡達人」後,到第二場五班一哩,用潘頓贏埋「領航大師」,個人用咗短短半粒鐘已經包辦第一口孖寶;其中「領航大師」單Win及組合獨贏A2分別派97及25元正。

「領航大師」上季最後一仗由潘頓贏五班谷草1800米開齋,事隔約四個月,這晚故劍重逢負133頂磅排12檔,沿途居後,齋跑半條直路於外叠一衝過晒,加埋頭場「泡泡達人」,呢口沈集成孖寶十蚊收911.5元非常和味。
「領航大師」馬主胡偉林一向同娛圈中人稔熟,這晚佢邀請吳國敬及風水師麥玲玲等人一起拉頭馬,場面熱鬧。胡偉林賽後大讚潘頓發揮出色,走外叠衝刺凌厲,加上馬兒落五班有利,很開心與一班好朋友分享勝利的喜悅。至於沈集成,他認為「領航大師」其實四班也夠跑,可惜之前常遇不利形勢,而潘頓騎慣騎熟,今仗唔搶而留後衝,贏在他騎功厲害。
呢場二至四名順序為「公証揚聖」、「辣得寶」及「吉利高」,四重彩派三萬八千蚊多啲,至於獨贏、連贏及位置連贏全面着啡燈的「寶成駿星」落場有前冇後,直路腳軟任過唔嬲,最終三甲不保表現欠佳,唔知同鞍上人蔡明紹頭場策「喜寶天龍」賽前墮馬影響心情有冇關係呢?