英錦標作為英格蘭第三級盃賽，只准英甲、英乙同青年軍球隊角逐，本身叫座力已經麻麻，今季仲搞埋啲分組賽，真係對唔少博升班嘅英甲球隊視為苦差。好衰唔衰英錦標有條例寫明，球隊要派五名或以上常規球員做正選，好似周二南部A組，英甲第五位嘅布里斯托流浪（黃衫）作客對英乙嘅樸茨茅夫（藍衫），布流理論上級數勝一籌，但似乎冇心戀戰。為咗符合條例，雖然都用咗常規門將基利奧斯打正選，但只係踢咗三分鐘就由韋爾普迪入替，純粹避免俾賽會罰5,000鎊。布流最終以0:1落敗，A組三戰只得兩分排包尾，既然大家不情不願，不如叫賽會「釋法」修例嘞。