特朗普當選美國總統，令全世界大跌眼鏡，證明就算擺明唔夠班，只要肯去見工，幾高難度嘅工都可能見得成。呢個例子，對於香港某幾個人，相當勵志。
噚日署理財經事務及庫務局局長劉怡翔回覆議員質詢，題目係「上市架構諮詢」，呢個爭議係財經界熱話，但睇真啲，提出質詢嘅，竟然係港島區議員葉劉淑儀，點解嘅？葉太平時關心邊個做特首咋喎，點解突然cross-over關心財經議題嘅。
立法會議員（金融服務界）張華峰都話唔明解，葉太爬頭都冇同佢打招呼，佢原本計劃好喺立法會大會提出議案，議員議案有成15分鐘畀佢慢慢講，到時先再打仗。
張華峰估計，可能業界怕諮詢期就嚟完（下周五，18日），驚趕唔切，咪嗱嗱聲搵葉太提出質詢。
葉太打滾政圈咁多年，朋友多就肯肯定，真係打埋算盤嘅話，就不得不提投行界老手、剛上市無耐嘅浩德控股（8149）主席葉天賜（Arnold），係葉太姪仔。
議事堂口痕友就話，葉太平日對財經冇乜兩嘴，又係直選議員，為呢啲業界議題發聲，所為何事呢，最衰華華噚日搵唔到葉太回應喇。