「窈窕淑女，君子好逑」，如果靚樣身材正，仲要運動有番咁上吓叻，自然不乏追求者。就好似美國女足前鋒雅歷絲摩根，近期不斷受到法國女足班霸里昂嘅班主奧拉斯嘅Twitter攻勢侵襲，唔知係想邀請佢過檔又好，甚至力追佢都好，已經係人妻嘅摩根就懶理奧拉斯，甚至已經喺Twitter block咗呢位67歲老人家。
火辣泳裝引死男球迷
27歲嘅摩根，除咗踢波叻，歷來118次為美國隊上陣，攻入71球，2012年幫美國拎奧運金牌，仲成為美國最佳女足運動員㖭。加上之前仲兼職做模特兒，拍咗唔少火辣辣泳裝照，更加吸引唔少男球迷，估唔到連奧拉斯都吸引埋箒。自年初開始，奧拉斯已經不時喺Twitter借啲意tag摩根，每逢摩根放自拍照或者講足球，奧拉斯都出手立即讚好，又大讚摩根係世界上最佳球員。就連里昂女足五月拎到法甲冠軍，奧拉斯喺自己Twitter大讚球隊之餘，仲無厘頭tag埋摩根，唔知仲以為摩根踢緊里昂㖭。摩根粉絲已經睇唔過眼，不時留言聲討奧拉斯，據報摩根亦都頂唔順，已經block咗呢位老人家。
其實奧拉斯想搵摩根過檔又好，甚至力追呢位索女都好，成功嘅機會差唔多等於零。摩根𠵱家就踢緊美國嘅奧蘭多城，隊波就唔算出名，不過勝在佢老公卡拉斯高都係踢緊美職奧蘭多，兩公婆分別效力男、女子隊，真係襯到絕。
班霸里昂多索女
拎過14次法甲同三次歐聯冠軍嘅里昂女足，之前都搵過唔少索女加盟，好似國足美女門將王飛就上年尾短暫加盟，但因為爭唔到正選，亦為咗備戰里約奧運而決定提早解約返中國大連。其實𠵱家陣中好似中場卡絲、前鋒諾希姆都樣貌唔差，奧拉斯不如專心捧吓自己麾下嘅球員好過啦。