喺劇集《愛．回家》中飾演「嚴謹」嘅38歲張達倫，噚日於深灣遊艇會筵開20席，迎娶拍拖兩年、貌似高圓圓嘅圈外女友陳鳳玲（Kimmy）！不過做文職嘅Kimmy好怕醜，只有張達倫單獨接受訪問。
𠱁媽咪開心
張達倫透露同老婆Kimmy係青梅竹馬，年前撞番撻着咗，問係咪要開turbo生BB？佢笑笑口話：「都想出年，哥哥今年生咗個女，如果我生仔，媽咪就會開心啲。」張達倫話見黎諾懿結婚兩年幾都未能造人成功，自己有啲擔心，仲向有一仔一女嘅徐榮請教，佢話：「徐榮教我飲醉酒好啲，不分日夜嘅，但今晚唔會不醉無歸，怕出醜呀！」
高海寧、楊明、莊思明、莊思華、羅天宇、湯洛雯同張嘉兒等都有到賀，近日頻頻出席婚宴嘅楊明坦言有諗過將來結婚嘅畫面，但都係未有實際婚期，反而高海寧好想幾年內結婚生仔，問係咪同另一半有共識？佢反應好大咁話：「吓！邊個？唔係呀，只係自己想生多幾個，唔想做高齡產婦。」
此外，噚日朝早張達倫搵咗《愛．回家》嘅黎諾懿、徐榮、朱匯林等人組成兄弟團去接新娘，新郎哥被迫穿上吹氣波衫，又要用腳趾喺冰水上夾麻雀，難關處處。問開門利係幾多？張達倫話：「好朋友在心中啦，大家玩得好開心。」
撰文：馮仁昭
