要嚟始終要嚟，要釋始終要釋，連真誠同莊重都可以客觀量化，真係諗番起影帝周潤發先生喺《監獄風雲》其中一句金句：「我大聲唔代表我冇禮貌。」DQ基本上已成事實，連建制大黨都準備補選落場，午餐肉先生又有機會復辟，真係諗起都興奮。
坦白講，當初梁先生都只係plan B，因為另一位梁先生俾最大嘅梁先生拒絕入閘，先有機會當選，所以小弟相信新東選民嘅腦袋，補選就算再換另一個梁先生，相信都可以擊敗建制派。
由plan B到正選
講開plan B，皇家馬德里今季只有一個主要嘅收購，就係從祖雲達斯回購艾華路莫拉達（圖）。據報之前唔係打算長用，只因為佢喺祖記踢到曉飛，3,000萬歐元回購之後，準備五、六千萬再賣番出去。
喺皇馬嘅BBC三叉戟中，莫拉達原本都係plan B，不過賓施馬受勒索官司困擾，連國家隊席位都不保，加上飽受傷患，今季狀態認真麻麻，莫拉達即刻由plan B升做plan A。周日對雷加利斯又貢獻一個入球一個助攻，累積四個入球，只係比C朗同巴利少一個。以佢𠵱家嘅狀態，絕對值得擔正。
喺西班牙國家隊，原本以為莫拉達24歲仔又當弗，首席中鋒位置都應該係佢。不過突然迪亞高哥斯達喺車路士回勇，排英超神射手榜首，仲拎番西班牙國家隊首席中鋒位置。對西班牙球迷嚟講，擁有DC、莫拉達，甚至老將阿度里斯等大勇中鋒，當然百利而無一害，但要莫拉達白白等正選浪費光陰，都唔係太抵。其實喺祖記時代，莫拉達都踢過右輔鋒，個人突破能力都唔錯，總好過轉投曼城後信心大失嘅洛尼圖，DC同莫拉達未必係plan A與B嘅關係，兩者都應該可以並存。
文：牽牛