新股桐成（1611）慘慘豬，隻隻新股掛牌都有得敲鑼，佢冇得敲喎。事關佢於本月21日（星期一）掛牌，港交所（388）話當日朝早冇得book場搞上市儀式，桐成老闆咪冇得敲鑼囉。市場懷疑，當日真係深港通開車嘅大日子，港交所要舉行開車儀式至真。
桐成主席徐乃成（Simon）噚日話，同港交所約緊，睇吓幾時可以「補敲鑼」，港交所冇同佢哋講，因乜事當日唔畀book場，但聽記者朋友咁講一講，證明21號上市係好日子喇。
Simon指，自己唔太care意頭嘢，上市後請同事食餐好嘅，「第二日再敲也不錯」。
講開又講，原來公司名字係老闆同佢個仔嘅混合體，用咗佢嘅「成」字，「桐」就係來自佢阿仔個名，老闆仲有個女，佢話如果再有新業務、新公司，就會用阿女個名。