本地騎師近日事故多多，不少非傷即停賽，不過唔代表佢哋完全捱打無力抗衡過江龍。何澤堯正係最佳例子，這晚佢於谷草第三場四班一哩，再騎蔡約翰馬房「騂龍」順利建功，幫華將爭番啖氣，單Win及組合獨贏A2分別派83.5及17元。
「騂龍」馬主係新界王劉皇發之子劉業強，「發仔」出任新一屆鄉議局主席及立法會議員以來，這晚至首次贏馬，可謂遲來的賀禮。四歲澳洲自購新馬「騂龍」上次同班同程配何澤堯跑第三，今場騎師不變，沿途居前，最終輕勝兩馬位之多，打開服役勝門，今仗同時見證蔡約翰季內首度與本地騎師攜手贏馬。
劉業強指「騂龍」抵港後最初所見既無前速又沒有加速力，曾想過把牠退役，換過另一駒來港，不過蔡約翰話馬兒十分健康，建議繼續競賽，結果得以建功。劉業強希望愛駒越跑越開心，再交出進步成績，路程方面以跑馬地1650至1800米最合。
呢場前四名馬匹全部來自名氣馬主，當中二至四名分別為蕭百君家族團體馬「奇真」、黃士心家族之「旅遊大使」及中巴後人顏傑強名下「太皇鷹」，四重彩派二萬八千幾。