「小超人」李澤鉅舊年10月提出將旗下長建（1038）與電能（006）合併，單刁11月被小股東vote down咗，轉眼呢件事就過咗一年嘞。就喺呢個時候，李澤鉅忽然減持電能，增持長建，呢個行動好耐人尋味啫。
聯交所資料顯示，李澤鉅分別於本月3號同7號，兩度增持長建合共22.7萬股，涉及資金1,454萬元。差唔多時間，佢於7號沽走15.1萬股電能，套現1,104萬元。
集團發言人解話，呢次買賣其實係超人新抱，即係李澤鉅太太王儷橋決定嘅，由於雙方係配偶權益關係，所以聯交所資料以李澤鉅名義顯示，但無論點，增持或減持都係好正常嘅投資行動咁話。
如果係牛頭角順嫂買賣股票當然好正常，小超人嘅太太出手喎，唔係普通換馬咁簡單啩，至於有乜啟示，就要大家加點想像力了。