人大釋法後，據聞除咗有官司嘅青政梁頌恆同游蕙禎及劉小麗，羅冠聰同姚松炎都有機會被指宣誓無效，雖然有其他議員用道具或叫口號，但除非有人提訴訟，否則都可望避過一劫，但近日傳傳吓，連建制派地產及建造界石禮謙同金融服務界張華峰都話會被DQ（disqualified），佢哋又衰乜嘢先？
英文網媒Hong Kong Free Press喺網站上貼出石禮謙宣誓影片，話佢將誓詞中香港特別行政區嘅英文「Hong Kong Special Administrative Region」讀成「唇」——「Administration」，由於人大釋法話宣誓要完整讀出誓詞，公民黨毛孟靜噚日借勢質疑石禮謙誓詞有錯，不符議員資格。
石禮謙聽完，不怒反笑，解釋當時較心急加上有老花，所以誤讀「Administration」，佢又話「Administration」同埋「Administrative」只係「形容詞和名詞」之差，字意無乜分別，讀音都冇問題，反指毛EE係「博上鏡」。
話4年都係鄉下音
張華峰都被傳喺DQ之列，係咪更加離奇？原來有人質疑佢鄉音出事。肥老闆被問到擔唔擔心議席不保？佢淡淡然自覺冇任何風險，「我4年講嘢都係鄉下音㗎喎，咁呢4年無得改㗎嘛！」
肥老闆心水清，話法律非常清晰，「真理就係真理，係無心就係無心，有心就係有心」，強調自己係「真誠」宣誓，皆因法工委副主任張榮順都話過，若非故意違反誓言就冇事，所以處之泰然。其實佢係邊度人？原來福建晉江人，難怪有福建口音。福建非Fxxking，應該冇事嘅。
李八方
mailto:[email protected]