Apple Pay、Android Pay最近相繼推出，費清自然要試用吓啦，用過幾次覺得的確係幾方便，雖然仲要喺部手機㩒幾吓，用法比八達通複雜少少，但付款速度一樣快。不過，費清最近使用Apple Pay時，就遇到難題。幾日前去百佳超市買嘢買咗$52.9，喺收銀處用Apple Pay付款，按收銀阿姐指示，放iPhone喺部機，好快手機屏幕已經顯示「完成」。不過，收銀阿姐話：「交易未完成喎。」吓？！費清話部手機顯示交易已完成，但阿姐堅持話過唔到數。費清只好再試，結果手機同樣顯示交易「完成」，但阿姐同樣話佢部收銀機顯示交易未能完成。費清只好用八達通畀錢，攞返張單之後向銀行查詢。費清手機Apple Pay嘅wallet畫面，的確顯示上一宗交易係$52.9，只好打電話去銀行問，銀行職員查帳後回覆，並冇$52.9呢單交易紀錄！職員講都有發現呢個情況，佢解釋Apple Pay交易分開客戶手機及商戶收銀機兩部分，可能iPhone部分確已完成交易，所以手機顯示「完成」，但超市收銀機可能因為線路繁忙等原因，未能完成交易，所以最終冇過數。除咗問銀行，費清之後知道查看Apple Pay交易紀錄仲有一個方法，就係進入iPhone「設定」嘅「Wallet與Apple Pay」，選擇付款卡後，會顯示所有交易紀錄，而費清喺呢度就見唔到$52.9交易紀錄喇。點都好，大家都要養成定時查看信用卡帳目嘅習慣呀，可以及早發現問題交易。究意，科技進步帶嚟嘅係方便定係唔方便？費清＃要生計，也要生活＃毋忘初衷