領展（823）每次舉行股東會、業績會都好有氣勢，總有一大班保安坐鎮，驚住有人到場示威，抗議佢哋加租迫走小商戶。
噚日佢哋喺金鐘一間五星級酒店舉行業績會，同上年一樣，又喺宴會廳門外擺晒鐵馬加屏風，記者要行過一條用鐵馬欄住嘅通道先入到會場。
而且，今次保安人數增加，現場目測，由舊年五步一保安，變到兩步一保安，門外保安連工作人員都有十幾人。可惜嘅係，佢哋保安準備如此充足，偏偏冇用武之地，舊年同今年業績會都冇人去示威衝擊。
更有趣係，業績會之後輪到分析員會議，領展員工又急急腳拆晒鐵馬圍板，讓分析員輕鬆出入。請問呢種保安到底係咩玩法。