西班牙喺呢輪國際賽有兩場波，先喺世盃外對馬其頓，之後友賽英格蘭。西班牙擁有球壇其中一對最強嘅中堅，就是沙治奧拉莫斯同碧基，但咁啱佢兩位加埋查維馬天尼斯都受咗傷，係教練盧比迪古試吓新人嘅好機會。
小弟好欣賞車路士嘅艾斯派古達（圖），如果要形容佢，真係一個字夠晒，就係「穩」。佢原本係右閘，但撞正艾殊利高爾退落嚟，佢就被安排去踢左閘。用右腳踢左閘，仲要係頂替球壇其中一名最具級數嘅前輩，真係幾有壓力，但艾斯派古達平穩接班。雖然佢助攻唔多，但防守滴水不漏。喺上季車路士風雨飄搖嗰陣，伊雲洛域、泰利同加利卡希爾都頻頻派膠，就係艾斯派古達鎮守嘅左路最穩陣。
今季車仔轉踢三中堅，佢就踢右中堅，表現亦相當好。呢位27歲球員係防線嘅通天佬倌，左中右全部都踢得，但小弟擔心呢樣優點會阻礙佢上位，俾人嘅感覺瓣瓣有但瓣瓣都唔精。再者，西班牙主帥盧比迪古呢幾場都踢4-2-3-1陣式。艾斯派古達近一個月都冇踢開左閘，但踢中堅的話，又怕佢唔太適應兩中堅體系，真係唔知點擺好，除非盧帥又跟潮流轉三中堅啦。
馬斯巴查有料到
最大可能上位嘅應該係多蒙特嘅馬斯巴查，25歲嘅佢係巴塞隆拿嘅青訓產品，但喺巴塞一直冇得打正選，所以今季去咗多蒙特。由於曉姆斯走咗，蘇保迪又成日傷，巴查已經成為球會正選中堅，相信佢呢輪國際賽有機做西班牙嘅後防指揮官。如果齋講名牌效應，巴查嘅中堅拍檔應該係皇家馬德里嘅拿祖靴南迪斯，呢位26歲球員趁皇馬後防傷兵多，近幾場都有得踢。叫佢一個擔大旗肯定唔掂，但跟住巴查身邊都應該可以嘅。
文：咖喱