曾經於一個馬季內，連勝香港短途錦標、日本高松宮紀念賽，以及新加坡KrisFlyer國際短途錦標三項國際一級賽的本港前短途馬王「友瑩格」，唔經唔覺已八歲老年。
「友瑩格」今晨(8日)試沙田第十組泥地1200米大閘，在潘頓胯下一放到底，大勝亞軍另一匹短途惡馬「英勇大師」超過6馬位，令前來睇試閘的馬主楊毅感到好滿意。
楊毅表示，練馬師蘇保羅十分愛錫「友瑩格」，老馬最緊要健康，不會迫牠太辛苦，楊毅話此駒上場久休復出跑精英碗，狀態得七成，結果殺入季軍，已算跑得好好，下場於本月20日爭馬會短途錦標，狀態可提升至八成以上，希望12月參與香港國際賽時，可以百分百水準迎戰。
楊毅話「友瑩格」八歲仍未顯著走下坡，已經好感恩。他幽默地說世上有幾多個保特，暗指「友瑩格」冇可能如保特般，長期都身處高位做一哥。不過楊毅唔使咁謙，既然「友瑩格」上仗七成狀態表現都咁好，退化程度可能遠比我哋想像中小。