立法會前排以呈請方式成立專責委員會，調查特首梁振英收受澳洲公司UGL 5,000萬港元事件。八方不厭其煩講多次，呢件事嘅問題在於CY收咗呢筆錢後有冇申報，佢同UGL簽嘅秘密協議所獲酬勞同佢為商業機構提供服務有冇同特首身份衝突等。5年前嘅今日，可能就係呢件事嘅原爆點。當年UGL之所以畀錢CY，係因為UGL要收購DTZ，而DTZ就係由CY做亞太區主席嘅戴德梁行母公司。5年前今日，城中一大熱話，就係DTZ因為盛傳有意賣盤導致股價大幅插水，連帶CY嘅持股亦縮水，保守估計CY身家5年內蒸發咗3億元。
當年大家都覺得CY好唔掂、身家縮水，繼而認為參選特首係佢翻身希望。但邊個估到，原來當時CY已經同買家傾掂數，一邊賣咗間公司、另一邊收番錢……