大家樂（341）今年初離奇爆出一單家族官司糾紛，主席羅開光胞姐羅德靈忽然向百慕達法院要求頒令，補發遺失嘅股票，事件擾攘大半年，大家樂噚日終於話，百慕達法院已經頒令，羅德靈乃遺失股票嘅實益擁有人，公司將要補發番214萬股畀對方。
以大家樂噚日收市價27.05元計算，羅德靈獲發呢批股票，市值超過5,700萬元。
成件事要由17年前講起，羅德靈早於1999年話，遺失超過214萬股大家樂，佢向股票登記過戶處報失兼要求補發新股票，但因為未能按規定提供銀行或保險公司嘅擔保而不獲補發。
七年後，佢搵過戶處傾都唔得，再過七年，佢要求大家樂豁免擔保規定又唔成事，佢今年初就要求百慕達法院頒令嘞。話晒一家人嘅事，但搞咗十幾年先搞掂，都幾耐人尋味。