特首「小圈子」選舉，1,200名選委即日起接受提名，金融服務界選委有18席，今屆好似好多財經人蠢蠢欲動，以往呢個界別主要係證券行老闆參選，今次多咗股評人有興趣，早前提過「靚佬財演」鄧聲興與自稱「財經八卦公」嘅周顯正積極考慮，新近聽聞，東驥基金管理董事總經理龐寶林亦有意參選。
龐寶林本身都係老闆，又經常喺電視、報紙評論股市，佢女兒龐卓欣（Ada）舊年選港姐，令佢晉身為星爸，知名度高咗，娛樂版都見到佢身影。佢承認，係諗緊參選選委，佢話喺行內打滾多年，要拉票都唔難，唔使女兒幫手咁話。至於佢係咪ABC又或支持邊個做特首，佢就支吾以對，話要睇邊個出來選先至講到。