特首選戰未正式開打已經花生滿地，財爺曾俊華因為帶團外訪先至收一收個勢，否則可能追住蓄勢爭連任嘅CY嚟砌！鬍鬚曾嘅攻勢初見成效，港大民研計劃10月24至27日訪問千名巿民，發現港人最熟悉嘅政治人物依然係特首梁振英，鬍鬚曾急速冒起，熟悉度對比5個月前升11個百分點至32%，只較CY差3個百分點，同時由第七變阿二，選戰可能更easy。
講到呢度，八方不得不提，排名方法係以被訪者喺冇提示下講出政治人物嘅名計算，所以排得高未必係最受歡迎，而好多人發夢都想踢走CY，佢排第一亦非冇原因。值得一提係民建聯主席李慧琼由21位升至第9，取代上次排第10嘅高永文局長，唔通受惠於立法會宣誓風波，琼子代表建制派炮打港獨冒出頭來？