今晨沙田舉行13組試閘，女將蔣嘉琦於第9組1600米草閘，策葉楚航馬房「可愛寶」起步未幾就被拋下墮馬，鏡頭都算驚險，好在人馬都吉人天相，並無大礙。嘉琦可以自己行返嚟，仲同工作人員講番事發情況。
近期華將意外頻生，蘇狄雄、梁家俊、吳嘉晉、楊明綸都先後受傷，黑過墨斗，今朝又輪到嘉琦出事，佢哋真係要去拜神轉運。講番嘉琦，墮馬有驚無險福大命大，隨時周三(9日)夜賽轉運有馬贏。
嘉琦BB座騎中，最強當然係第六場三班1800米的「包裝騎士」，剛由郭能跑同班同程，排12檔亦一放到底，可見進步，今次6檔好得多，改配嘉琦減7磅，反而比上仗贏馬少負兩磅，看來大有機會建功，成為嘉琦在港第45Win，便可升格減5磅，向70場頭馬畢業之路行前一步。