位於烏溪沙沙灘、被稱為「海洋之心」嘅心形石，最近面對唔少挑戰，話說心形石出現後，有市民依樣葫蘆，用石頭砌「主是愛，祝福你」字句，掀起一片留字定拆字嘅討論。身為當區區議員嘅民主黨李永成，近排就為咗呢單嘢疲於奔命。
李永成6月喺區議會動議叫政府將沙灘升格為法定泳灘，咁康文署就有權管，原來當時區議會係一致通過㗎，但政府就愛理不理囉！李永成認為心形石固然要保留，因為呢個係沙灘賣點，之但係唔可以忽視越來越多人去堆石嘅問題，會對生態造成影響，例如早年個灘有好多蟹仔，但家陣已經唔見晒。雖然政府嘆慢板，但佢都繼續追，嚟緊約咗政府傾，希望有啲進展咁啦。