利物浦喺周日英超主場6:1大破屈福特，趁今輪聯賽曼城同阿仙奴都失分，終於喺領隊高路普入主後首次升上英超榜首。高路普話登頂冇壓力，但叫球迷們唔好興奮得太早，爭標仲有排鬥。
紅軍上一次坐喺英超榜首已經係14年五月嘅事，周日大勝屈福特場波，紅軍全場有28次射門，而17次中目標更係自03年有紀錄以嚟單場命中次數最高嘅一次。賽後高路普話：「踢咗11場波上榜首，我哋冇感受到任何壓力，𠵱家呢隊利物浦，同兩年前嗰隊已經係兩回事，我哋會保持冷靜。球隊𠵱家無疑係喺最理想嘅位置，但現階段排第幾都冇意思，好多球隊都表現得好好，如果認為𠵱家領先一分代表啲乜嘢，咁我真係幫唔到佢哋。」
史杜列治繼續食齋
三叉戟菲臘比古天奴、羅拔圖法明奴同沙迪奧文尼喺今場波都有進賬，連韋拿杜姆都攻入加盟紅軍後首個入球，最慘係史杜列治，後備入替中兩次楣，今季英超仍然未開齋。