非常支持人大通過釋法嘅民建聯博士級人馬葛珮帆，噚日下晝立法會議員辦事處收到封「屎信」！事緣係葛珮帆嘅職員收到封匿名信，拆開之後，見到入面有張懷疑黐住糞便嘅白紙，受到驚嚇，覺得好惡心，好驚暴力會繼續升級！葛珮帆助理隨後報警求助。
9月收過粉末信
葛珮帆報咗警之後，有其他喺立會工作嘅人見到至少有7名警察「操兵咁操咗上樓」，即刻問立法會保安部發生乜事，保安部話警察係去立法會6樓、即民建聯所屬樓層處理案件。葛珮帆事後向傳媒發放新聞稿，話香港係法治社會，絕對接受唔到任何人用恐嚇他人嘅方式表達意見，又指社會唔應該縱容暴力。
翻查資料，原來葛珮帆喺立會報警唔係第一次，佢今年9月已經收過有粉末同埋辱罵字條嘅匿名信，嗰次報警之後，警方一度派出爆炸品處理課到場處理、仲封鎖6樓，之後證實嗰啲粉末係麵粉。