新一屆特首選舉委員會今日起接受提名，1,200人嘅小圈子中唔少席位已經名花有主，包括自動成為委員的70位立法會議員；而大批重量級議員卸任後冇咗呢一票都心癢癢，透過搶攻選委會保住特首投票權。
到底邊一啲前議員搶攻選委會？嘩，真係一隻手都數唔晒㗎！嗱，民主黨何俊仁同公民黨梁家傑，據知會參選法律界選委，喺法治受損下協力全搶30席，保住香港司法不被下屆特首再肆意破壞。
謝偉銓謀住補選
上屆商界一嘅票王、自由黨田北俊擺明ABC，又點可以唔選保住踢走梁振英嘅矜貴一票？唔知田少會唔會好似同仁哥早前喺白鴿黨慶咁雙劍合璧，燒番689轉頭？
工黨張國柱卸任社福界後，仲有好多energy，聯同民主派喺社福界搶位；大家記唔記得民主黨單仲偕做過資訊科技界立法會議員？佢都會喺IT界搶灘。梁家騮則擬喺競爭激烈嘅醫學界參選，呢個界別反梁情緒高漲，唔知怪醫點樣裝備上戰場？喺測量界立法會敗陣嘅謝偉銓，則有意喺選委會測量界上演復仇戰。嗱嗱嗱，人大釋法後，獲選嘅測量界議員姚松炎都可能議席不保，若有補選，唔知謝偉銓會唔會再戰一雪前恥？
當呢班前議員要披甲搶灘時，張華峰、易志明、莫乃光呢3位2011年選委會嘅金融服務界、航運交通界及資訊科技界票王，今屆自動有票。姚思榮同梁繼昌分別喺旅遊界及會計界選委戰第三高票，今年同樣因立法會議員手握一票。
八方發現有啲梁粉喺選委戰「實力」一般，但都喺2012年當選議員，例如曾經提名梁振英選特首嘅工程界盧偉國，2011年選委戰唔係高票，卻喺翌年立法會選舉撼低何鍾泰當選。民建聯何俊賢、劉國勳、柯創盛，同演藝界馬逢國等喺上屆一早提名梁振英，今屆因為議員身份有票投，唔知仲係咪心繫梁特首？
李八方
mailto:[email protected]