上回講到，金融界有好多人不滿證監會、港交所（388）提出嘅「上市架構改革」諮詢文件，仲話想遊行抗議。暑假時冒起嘅反對陣營旗手「Wakeuphk」，終於喺facebook專頁公佈詳情，話今個星期日（13日）下午2點，喺中環遮打花園集合之後，遊行去證監會（超人旗下長江中心）同交易所，遞交請願信。
呢個名為「反對上市改革諮詢文件的不合理建議大遊行」，趕於18號諮詢期完結前舉行。之前有人吹風話有成2,500人咁多，聽聞金利豐（1031）全體仝人都會去撐場，但同時又有業界組織就話「人哋冇叫我哋囉」。
證券學會方面就話，可能因為佢哋雖然贊成改革內容要檢討，但同證券商協會、上市公司商會一面倒反對嘅意見唔同，亦唔認為遊行示威有必要，所以冇人接洽證券學會。之前問過立法會議員（金融服務界）張華峰，佢都同意話業界冇共識要去遊行咁大陣仗。
噚日華華問Wakeuphk發起人、「居屋小炒王」鍾錦江，佢竟然話有幾多鐵腳去、有乜大佬撐場，一概唔清楚，連佢自己本人當日出唔出席，都未諗定喎。
連搞手自己去唔去都未定，咁得意嘅？抑或Wakeuphk只係純粹「轉載」遊行詳情，唔係發起人呢？