七隻本地地產股周一拖累恒指多達130點，如果唔計地產股跌幅，恒指應該升288點，假若冇咗辣招，相信地產股都會升，咁恒指就有超過300點升幅，算係一個大反彈。不過，周一主板成交602億元，扣除地產股成交增加逾50億元（不計輪證），喺冇辣招情況下，睇怕主板成交550億元都未必有。
滙控（005）、金沙（1928）雙雙由長方形低位附近，憑一支大陽燭急彈到長方形頂部水平，神華（1088）更突破上星期二超大成交日嘅高位。股價雖強，但無獨有偶，呢幾隻股都升到至少延伸咗年幾兩年嘅頸線阻力位置，要破頂就要有更多買盤去掃清蟹貨。港股主板成交，每100蚊就有近8蚊買入呢3隻股，市場仲有幾多資金可以調動去狗衝呢3隻股，短期成疑問。特朗普失落總統寶座，真係會令資金蜂擁回歸股市？小弟唔多信。
地產股噚日跌幅遠超預期，最諷刺係，加辣本身亦對新盤銷情同樓價都未見得有好大殺傷力，亦睇唔出政府會連環出招。揸住地產股嘅大戶，除咗政治考慮之外，頗難理解基於乜嘢原因，要喺地產股喪跌一成之下都仲沽貨。地產股業務槓桿低，睇唔出有大風險，如果滙控、金沙、神華等等強勢股遇上阻力，資金或回流地產股。
晉佳
http://fb.com/advanceguy1