【本報訊】宣佈參選特首後，胡國興稱睡眠時間較出任暫委法官時更少，由過去每日6小時減至5小時，上午6時已起床，「因為要見好多人，同睇好多剪報」。
習慣耍太極
胡又指，現時外出多了市民認出自己，試過在添馬公園遇到年紀相若的長者，對方支持他參選特首，「佢話都忍咗梁振英好耐喎」；亦試過坐港鐵時被年輕人認出，着他「加油努力」。
雖則年屆70歲，胡國興仍然好精靈，他認為年齡不是最重要，「最緊要睇個人精唔精神」。
原來胡國興平日不多做運動，但卻習慣耍太極──語言上的太極除外。至於他的飲食喜好，亦與選特首的目標一致，重視有選擇，近日最愛是打邊爐，「因為有得揀，想食菜可以食多啲菜，想食肉可以食多啲肉」。
胡雖然喜愛打邊爐，但他4年前卻戒掉長達46年的另一種「打邊爐」活動──吸煙。他憶述20歲讀大學時吸第一口煙，直到2012年為了更健康而戒掉，至今仍然覺得香煙「係香嘅」，苦笑道：「如果你整口畀我，我怕真係會攞嚟食。」透露那些年煙癮高峯期，「曾經一日食成兩包煙㗎」。
■記者林俊謙