卸任後好少發表政見嘅前特首曾蔭權，噚日起喺《Am730》出專欄，喺跑馬仔氣氛熾熱、以及兄弟班財爺曾俊華盛傳爭入閘時，有官司在身嘅佢咁高姿態嘅舉動，令人好多猜疑，唔通為兄弟入閘造勢？
話否決「普選」好悲痛
睇番噚日佢嘅頭炮，主要係訴心聲講出幾年嚟鬱結。煲呔話離開政府前都告誡自己退休後，唔好再對公眾事務「絮絮不休」，但認為𠵱家睇事物嘅角度唔同咗，「難免會牽動很多往事湧上心頭」，憶述當年選特首，有同事叫佢凡事唔好太上心，因為香港一日冇普選，特首作為「不民主的產物」，點都唔會討好，佢強調唔係唔明白呢一點，卻「一直有點不忿」。
佢話自從離開政府後，有機會脫下「有色眼鏡」，以唔同角度睇世情港事，覺得𠵱家對一啲政事會有更深切了解，亦可能更客觀。佢重提2007年連任特首時決心推動特首及立法會普選，而去年立法會否決「普選」特首「是何等傷心及悲痛」，強調香港須造就各黨派建立更大互信，以及佢哋同北京之間嘅互信。若然佢好兄弟曾俊華做到特首，唔知可唔可以喺呢點幫到手？