在馬場見到地產代理紅人馬主W，笑佢隻馬冷爆熱倒，自己收埋嚟食。馬主W當堂申冤：「大佬呀，第二個咁樣講我，當佢唔識馬，你自己有養馬，知道馬主幾慘情嘅啦，仲笑我？」騎騎，講吓都得啩，做馬主俾貼士最慘，話俾人聽今次贏得，偏偏輸成條街，下次話冇信心，隻馬又識爆冷，於是親朋戚友媽聲四起，左丁山聽得多咯。馬主W隻馬月前爆大冷，佢話事先完全唔知，收獎金都幾高興，跟住再出，話有信心喎，馬主W自己就輸到暈得一陣，兼俾手下代理唱到面紅，慘也。
不過馬場只係業餘興趣啫，郭大少岳少合作嘅樓盤推出賣樓先至係大件事。講到呢樣，佢話啲新樓好賣得，將軍澳新樓盤加價加推，照樣清袋，代理收佣金收到笑逐顏開，咁鬼旺，樓市前景點睇？馬主W話：「正經啲講，又唔係真正興旺似九七嘅，現在係旺兩極，細價樓兼新盤，與億億元嘅超級豪宅。細價樓即五百萬元以下樓盤，容易做到銀行按揭，父母容易為子女拿出百零二百萬首期，超級豪宅啲買家唔駛借錢供樓嘅，話買就買，至於新樓盤，啲發展商絞盡腦汁，為買樓人士提供首按次按，一供到底及五年、八年以至十二年成交期，你夠膽買，覺得自己份工夠穩陣，長期供樓冇問題嘅話，有三幾十萬在銀行就可以做新樓業主。現在買新樓好易㗎，發展商為你諗好晒財務安排，你揸住幾十萬銀去簽個名就得。」
咁容易，金管局唔理嘅咩？馬主W話：「金管局只係可以管銀行，管唔到發展商，就因為咁，啲六七百萬以至一千萬左右嘅二手樓盤就好蝦人買，靜到極。呢啲就係中產樓盤、中產人士最冇癮，換樓唔夠首期（因金管局嚴限按揭，最多借到五百萬），換樓時，買樓要首先俾額外印花稅，等賣樓後先至等退稅，cashflow會有問題㗎！」因大家在沙田馬場，望到沙田第一城與駿景園，問馬主W兩個中產屋苑有乜分別，馬主W話：「呢，比較第一城與駿景園就係最佳案例，第一城有好多細價樓，樓價升到飛起，相反，駿景園最多千一，千二呎單位，最細嘅係715呎，呢隻單位嘅樓價在七百幾至八百零萬之間，升得好慢，馬鞍山啲新盤都萬三四蚊一呎啦，駿景園呎價仲係停留在一萬蚊至萬一蚊之間，完全跑輸大市，主要原因咪係中產階級買一千呎二手樓唔易籌集到首期囉，駿景園有五十呎大泳池，新豪宅泳池就似大浴缸，但點解駿景園呎價大落後呀？研究吓金管局嘅限制按揭招數就知道。」聽完佢咁講，散場後就打電話俾一個老友B：「喂，你個仔要結婚買樓呀，你去問吓代理，有冇駿景園樓盤吖。」