噚日西甲早場，加里夫巴利威晒，個人梅開二度，幫皇家馬德里主場以3:0擊敗升班馬雷加利斯。基斯坦奴朗拿度（C朗）兩次都只能做最近嘅觀眾，望住巴利射入，希望佢唔好嬲嬲啦，因為西班牙傳媒講到實牙實齒，皇馬願意同呢位葡萄牙球星續約五年。
拎埋黃牌賀皇馬贏3:0
皇馬呢場由艾華路莫拉達擔正，拍住C朗同巴利攻堅，但皇馬進攻好差，C朗幾乎隱形，仲因為向球證投訴拎咗張黃牌，佢掂親波都冇乜威脅，同上場歐聯嘅狀態差唔多。22分鐘，C朗接應過頭波入禁區，控到定之後抽咗上看台，球證仲話佢越位在先。37分鐘，C朗喺禁區外發炮，但遠射斜出。相比之下，巴利就有效率得多，佢延續上周中歐聯開波57秒就入世界波嘅佳態，喺38分鐘先開紀錄。艾斯高長傳，巴利突破越位陷阱，快步推過門將射成1:0。
臨完上半場前，皇馬罰球斬入禁區，喺混亂之中莫拉達撞到個波去龍門口，巴利就咁啱企咗喺度，快對方門將一步射入，幫皇馬半場拉開到2:0。巴利入波嗰陣，C朗就係企喺佢後面，又做最近嘅觀眾。呢場C朗真係冇乜態，波都少掂，下半場幾次具威脅埋門都只係同巴利有關。60分鐘，卻奧斯斬罰球，巴利又攝到個靚位一頂，但被救到。其後，莫拉達錦上添花，幫皇馬鎖定贏3:0，繼續穩坐榜首。
將續約5年人工達21億
雖然C朗踢得麻麻，但應該唔會影響到佢續約嘅。西班牙《馬卡報》披露，C朗同皇馬已經傾掂數，只要搞埋啲細節，相信嚟緊幾日就會落實續約五年到2021年，到時C朗就可以喺皇馬踢到36歲。之前一直有報道講，皇馬主席佩雷斯認為C朗年紀大又多傷，唔想同佢續長約，但喺C朗嘅「超級經理人」文迪斯談判之下，最後皇馬都同意。據報，C朗喺嚟緊五年嘅人工合共有2.15億鎊（約21億港元）。
除咗𠱁得掂皇馬同佢續長約之外，C朗喺推銷個人品牌都有一手。C朗日前上載咗張基味濃嘅宣傳照上網，見到佢着住CR7底褲，瞓喺花叢度，露出腹肌。喺呢幾日，啲網民瘋狂改圖，例如將C朗key咗去美斯啲相度，惡搞C朗挨喺美斯膊頭度瞓覺，hehe指數爆燈！不過，每張惡搞相入面，都見C朗着住CR7底褲，換句話講，網民越改得勁，越傳得開去，C朗個人品牌嘅曝光率就越多，睇嚟C朗嘅「幕後玩家」都好有諗頭。