銀行推信用卡一向落重本送飛行里數、麵包機做迎新，估唔到財仔安信信貸為推新卡去得更盡，上個禮拜六、日分別在尖沙嘴、旺角玩快閃派錢，濕平完行過，畀張單據安信職員，就可以按單據金額現兜兜claim番錢，每人最多袋800蚊，事後要影相放上facebook幫手做推廣。
但阿媽教落：「邊有咁大隻蛤乸隨街跳」，華華聽完半信半疑，前日專登去旺角行人專用區行個圈，估唔到又真係等到安信找數，有位拎住Dior袋嘅少女拎住八舊水影相。華華亦為啱啱濕平買嘅秋裝claim咗300蚊。
其實財仔出信用卡並非新鮮事，AEON信貸旗下都有和民卡、KFC卡，主打飲食消費，安信呢張新卡WeWa卡，聽個名都知係主攻年輕人市場，唱K、睇戲有現金回贈，以玩樂做主題。
點解財仔信用卡有市場？原因係銀行信用卡有年薪要求，年輕人未必過到批卡門檻，財仔信用卡應運而生。不過，華華一向唔鼓勵先使未來錢，銀行同財務公司信用卡嘅利息一樣都要幾十厘，旺角唔係吓吓都有人幫你找數㗎，今次派錢只係宣傳技倆咋。