5年前今日係區議會選舉結束翌日，焦點去番特首選委會選舉。喺呢個時候，骨科醫生高永文牽頭組「七君子」名單，喺競爭極為激烈嘅醫學界參選，當時大家視高永文為梁營中人，佢就話自己冇預設立場，如果當選會搵獨立機構做民調並跟結果做決定。
結果七君子名單有6人當選，而高永文更加以1,661票跑出，同當年以1,690票做票王嘅蔡堅得票相差好少，最終高永文提名CY參選，CY當選後就委任佢做局長。
喺CY當年當選後冇耐，《蘋果》就報道有政圈人士透露，2006年初香港一班專業人士成立咗香港專業促進會，CY做主禮嘉賓，高永文係創會副會長，會董有陳茂波，蔡堅係成員之一，蔡堅最後同醫學會一樣投票撐CY。但今屆再戰醫學界選委嘅蔡堅表明No CY，大家又知唔知點解？