日本選手想夾擊香港女車神？冇咁易！李慧詩（Sarah）上周六繼續喺東京出戰最後一站日本女子凱林賽京王閣站嘅次日小組賽，面對其餘六位日本車手嘅夾擊，Sarah都冇有怕，全靠最強大腿發揮以一敵六嘅爆發力，成功贏其他對手一條街，首先衝線，喺日本連續贏得第11場勝仗。
Sarah喺上周六嘅第二場小組賽，繼續同六位日本車手鬥四圈賽事。直到剩番兩圈嘅時候，兩位車手突然加速上前擋住Sarah突圍外線嘅去路，由於前後都有車手，Sarah慘變「三文治」，仲一度由第二位跌落第五位。放慢咗速度嘅Sarah，終於喺最後一圈搵到位置，由外邊加速突圍，仲好快就超過所有車手搶到第一位，之後越爆越有，最終仲贏第二位嘅中川諒子一條街㖭。
賽後Sarah話今場俾好多車手夾擊，不過最後都盡力超過佢哋：「希望聽（今）日嘅決賽會更緊張刺激，而且盡力調整好身體狀況。」Sarah仲用英文同現場嘅車迷講：「聽（今）日見！」Sarah嘅最大勁敵、德國車手禾高和英國車手瑪珍，同樣喺兩場小組贏得首名入決賽，Sarah今日將會有一番惡鬥，力爭第四個日本冠軍。而加拿大車手蘇妮雲就喺第二場小組賽得第四，無緣決賽。