上星期一帶住世青賽（U15）Techno 293冠軍獎盃回港嘅風帆少女麥卓穎（Wing），噚日回歸香港比賽，參加一連兩日喺赤柱舉行嘅香港滑浪風帆巡迴賽，雖然比賽期間發現部份器材爛咗，又有大批傳媒喺途中突擊訪問，但都冇影響Wing陣上演出，喺17歲以下組別仲排第一，而15歲以下組別就排第二。今日得番兩場比賽，佢會全力爭冠，希望保住巡迴賽總成績領先位置。
卓穎17歲組別排第一
噚日係Wing攞完世青冠軍後首仗，佢一早入到賽前簡報會，一班同齡隊友都叫佢「世界冠軍」，Wing以笑容回應，佢覺得係好事：「雖然係有少少壓力，但呢個世青冠軍更可以推動我每場比賽都要做得更好。」年僅13歲嘅Wing，可以咁淡定面對外界嘅稱讚，認真難得。
比賽前，見到人仔細細嘅Wing自己set帆板，獨力將帆板搬落海，的確好氣好力。噚日賽事喺中至細風進行，結果佢以兩場第二同埋一場第一完成，暫列女子15歲以下組別第二，同17歲以下組別第一。賽後佢就唔係好滿意自己表現：「我開始時有少少判斷錯誤，諗住選嗰邊會大風啲，點知冇風；另外，攞咗一啲爛爛地嘅器材，板同帆中間嘅接駁位爛咗，雖然可以控制到，但影響咗速度。」今日仲有兩場比賽，喺頭三站巡迴賽總成績暫領先兩個組別嘅Wing，希望保住呢個優勢，事關仲有兩站比賽。
師姐晞文RS:X組居首
除咗麥卓穎，香港一班奧運代表包括里奧代表鄭俊樑同盧善琳（Sonia）都受注目，23歲嘅Sonia右手有奧運五環嘅紋身，好搶鏡，佢話想紀念去過奧運外，仲想提醒自己繼續努力，為2020東京奧運衝刺。復操冇耐嘅佢，喺女子RS:X組以一場第一同兩場第三，暫列第三位；大佢少少嘅陳晞文，暫時以兩場第一同一場第三，位列第一。男子組暫由梁灝雋以兩場第一同一場第二排榜首。
噚日發生少少意外，九月底喺澎湖世錦賽前訓練整傷鼻樑，要縫17針嘅馬君正禍不單行，噚日搽咗粉紅色防曬，點知喺第三場途中，帆板過滑，搞到右腳趾公腳甲外翻，要送入急症室。雖然已出院，但就唔能夠繼續今日比賽。
