【本報訊】香港政治碎片化的年代，民間人權陣線號召力大不如前，七一的和理非嘉年華遊行模式，近年屢受批評；新任民陣召集人區諾軒直言，「做得基建，就無得起摩天大廈；而如果係冇基建，基本就起唔到摩天大廈」，強調民陣作為民間動員平台，已盡力照顧不同團體需要，稍後會邀請三個自決派組織香港眾志、土地正義聯盟及小麗民主教室加入，壯大平台力量。
2003年7月1日民陣首度舉辦7.1大遊行，當年中四的區諾軒也身在黑衣人堆中，與50萬人同上街反對23條。
13年後長大成人，29歲的區諾軒獲選民陣召集人；雖是民主黨成員兼南區區議員，民陣卻是他從政起步點，「2008年以中大學生會代表身份去民陣開會，仲早過（2009年）加入民主黨。」
區諾軒坦言傘運後香港政治踏入碎片化年代，民陣前路越來越難行，「2008、2009年民陣搞遊行，都等於全個公民社會；但今日搞，就唔代表晒，起碼有幾個板塊非民陣團體。」
區諾軒稱，傘運後甚至聽過有人說，「民陣？執咗佢啦，仲搞咁多嚟仲乜？7.1都係行禮如儀」，對此不太同意：「呢個講法係大家唔再需要阿公、唔再需要大台，但其實大台嘅重要，係喺一個運動上做基礎建設。」
籲警視作申訴渠道
「行禮如儀」是近年屢見諸民陣的批評字眼，區諾軒強調事實並非如此，舉例指2014年7.1遊行後、遮打花園的預演佔中「511事件」，「民陣嗰時就係同相關組織有默契……每年都諗好嘅方法照顧唔同團體（需要）。」
他強調民陣未必與其他組織「做到最激」，但堅持底線之餘，與其他團體有不少合作空間，透露會向三個自決派組織香港眾志、土地正義聯盟及小麗民主教室招手，「會親自致函佢哋加入，其實大家喺社會運動上手法冇分歧。」
至於青年新政等是否也獲邀？區笑說，「人哋未必騷你，我哋啲團體可能都有意見」。
掌舵人任內尚有另一項重點工作，原來傘運期間，民陣秘書處接獲不少前線警員匿名訊息，包括清場部署及添置裝備等，「有啲良心警察，佢哋亦唔想再有朱經緯等事件發生……佢哋希望分享咗訊息，社會去跟進，咁警隊就唔會做得太過份。」
但傘運後兩年有關消息卻中斷，區呼籲警員續視民陣作申訴渠道，直指：「你搵監警會都冇用啦」。
■記者許偉賢