恭喜「超級丹」做老竇！林丹老婆謝杏芳上周五晚喺北京分娩，生咗個仔，母子平安。林丹噚日朝喺微博上載咗佢哋一家三口嘅合照，囝囝合埋眼，好似瞓着覺咁樣，而啱啱生完BB嘅謝杏芳睇落面色亦唔錯。林丹除咗留言歡迎囝囝嚟到呢個世界之外，梗係要多謝老婆啦，「芳芳辛苦了」。內地網民都戥林丹開心，噚日半個晏晝已經有超過10萬個like，祝賀嘅留言都有幾百頁。有網民話中國羽毛球壇嘅未來就靠晒林丹個仔嘞，因為佢父母都係羽毛球好手，相信打羽毛球嘅資質一定好好。33歲嘅林丹拎過兩屆奧運男單金牌，家陣世界排名第三，至於35歲嘅謝杏芳都拎過奧運銀牌。
林丹嘅經理人張先生接受《蘋果》查詢嗰陣話：「詳細情況我都唔知道，佢只係話好開心，太太謝杏芳辛苦嘞，好多謝朋友、媒體嘅祝福。」