綽號「炒飯哥」的澳洲騎師羅理雅，於周日（6日）沙田賽事座騎中，毫無疑問以尾場第11場三班1400米隻「怪獸家長」最受注目。
此匹何良馬房四歲明星馬，上次增程初跑田草1600米，因為梁家俊於較早場次墮馬受傷，因此「怪獸家長」臨時易配羅理雅，當日此駒抽到黃金1檔，羅理雅以為可以慳晒位，點知人算不如天算，馬兒喺直路中段不幸受困塞車，望唔到空，結果姍姍來遲不敵「宅大大」屈居亞軍。
「怪獸家長」今仗縮番落曾兩捷的1400米，預料會衝得更勁，不過呢匹實力分子排外叠11檔，表面上形勢麻麻，但羅理雅話反而仲好，因為「塞車」機會大大降低，而且「怪獸家長」開鑼日贏馬嗰次，亦係10檔起步，根本目前喺三班，轉彎走外叠蝕得起，照羅理雅咁講，似乎對今仗信心爆棚。