體壇拾趣：
ＫＤ倒戈封殺攝記韋少

杜蘭特（Kevin Durant）轉投勇士後周四首次倒戈，「升呢」做雷霆大佬嘅韋斯卜克（Russell Westbrook）除咗喺賽前扮睇唔到呢位舊隊友，仲着咗件印上「官方攝影師」嘅螢光橙色龜背，唔知係咪想寸KD之前不務正業去做攝影師呢？

KD鍾意影相就係人都知，上年仲走去NFL超級碗客串攝影師，而韋少賽前就着起件印有「官方攝影師」嘅螢光橙色龜背，似乎想寸KD咁。不過，韋少就話呢件龜背唔係想針對任何人，只係覺得好睇先着：「我之前去西班牙同皇馬打季前賽嗰陣得到呢件龜背，我見到班攝影師着住佢行嚟行去，覺得呢啲龜背可以變成時裝。」講番場波，KD完全冇留手咁轟入全場最高嘅39分，包括射入七球三分，平咗NBA史上倒戈球員嘅得分紀錄；雖然韋少今場都交出「雙雙」20分10助攻，但都難阻雷霆輸96:122，俾勇士大炒26分。
騎士喺同日另一場就憑住勒邦占士（LeBron James）交出「雙雙」30分12助攻，主場以128:122擊敗塞爾特人，保住開季五場不敗身。
不過，佢捧嗰隊克里夫蘭印第安人啱啱喺MLB世界系列賽輸畀芝加哥小熊，老友獲迪（Dwyane Wade）就提佢記得要找數，喺下月二號作客公牛時要着起小熊波衫。