Boe媽同彤叔紅顏知己兼親姪女Cindy斷親情，有指係因為Cindy覺得Boe媽貼小白臉，即係Boe媽身邊37歲大陸歌手羅邏聖，所以疏遠Boe媽，就連原本答應每月幫Boe媽畀6千蚊租，近呢3個月，Cindy都冇再畀，仲同Boe媽斷絕來往，《蘋果》早前影到神隱足4年嘅Cindy，見佢不時湊住個5歲大嘅小女孩，平時有名車由司機接送，生活都算富裕。
昨日有周刊爆搵過Cindy，佢向報道稱自己並非唔幫Boe媽，只係Boe媽唔珍惜，話自己之所以唔畀嗰份錢嘅原因，Boe媽都講咗出嚟，問到早前Boe媽聲稱被陌生男子打電話恐嚇，叫佢收口一事，Cindy就話Boe媽點都好，都係佢姑姐，自己唔會講Boe媽嘅衰嘢出嚟，唔想講屋企嘅嘢，認為自己冇需要畀人知自己對Boe媽有幾好，只要Boe媽知就夠，不過Cindy就唔肯講有關身邊5歲大嘅小女孩嘅事。
Boe媽上周一又同大陸歌手羅邏聖現身，向周刊透露話係Cindy固執，Cindy爸爸都有打過電話嚟叫佢哋唔好嘈，仲話自己都唔想煩，羅邏聖更坦言係Boe媽男友，不過家人反對佢哋喺埋一齊，佢唔介意Boe媽有老公同囝囝，鍾意Boe媽有品味，就算畀人話佢係第三者、小白臉，羅邏聖都唔覺得有問題，笑言香港好開放，咁阿Boe媽都承認羅邏聖係追緊佢，佢仲話自己又唔係同老公離婚，老公患癌症又理唔到佢，又指自己係女人，都需要愛。
Boe媽又堅稱冇做過嗰啲，瞓埋一齊都唔會碰對方，住酒店都係分房瞓，Boe媽講到佢有老公，又有第二個男人，Boe媽竟然話聖潔就是力量，又冇同羅邏聖做愛，Boe媽又爆羅邏聖育有一女，前妻係家人安排佢哋結婚，羅邏聖對前妻冇感情，囡囡跟前妻喺四川生活，一年先見一次。