孫耀威（Eric）前早才大呻開餐廳和酒吧生意蝕了千萬元，遇上拍檔走佬，令他債務上身。估不到半年回氣，Eric近日又與兩友人合股近千萬在尖沙嘴The Mira酒店商場內開一連兩間男士高級禮服訂製專門店TUXEE，其中一店日前試業，另一地舖尚裝修中。
「隨時老婆要倒貼」
Eric前日在新店大談生意經，他說：「西裝可以展示男性魅力，如果只係傳統款式，個個着出嚟都一樣，我想利用唔同布料配設計，衝出呢個框框，我啲設計好玩嘢，瘋狂嘗試。」Eric為新店費盡心思，店中佈置簡約，貨架掛了色彩繽紛禮服。他不擔心逆巿連開兩舖有風險：「當人人北上賺人民幣，我有信心香港可以做出好品牌，然後向世界出發。兩間店連營運費，隨時過千萬，我預咗生意要守。」這次創業有動用老婆本嗎？Eric笑言：「使咗老婆本好耐，隨時老婆要倒貼畀我，我得番一堆衫。」
Eric究竟何時才娶女友陳美詩？曾被傳秘婚的他說：「我年年都話出年結，我都想搞，我好想有小朋友。但𠵱家唱片同生意同時進行，我唔敢對另一半開空頭支票，我覺得結婚要一個衝動，唔排除我會閃婚，可能有一日，你會見我抱個仔出嚟。」
採訪：陳杰
攝影：陳順禎
