曾自詡「白宮發言人」的新聞統籌專員馮煒光2016/17年度連約滿酬金，將可以淨袋薪酬383萬元，日薪過萬，十分和味。
佢經常跟「老細」梁特出出入入，喺周二行會前不時用iPhone拍低梁特接請願信嘅情形再放上網，特首選戰臨近，梁特幾乎日日fb出post，馮煒光最大職責似乎係做龍友，噚日跟梁特出席公務員事務局局長嘉許狀頒奬典禮，就同其他攝記排排企，攞住單反相機，攝位影相，真係好專業呀……咦，佢係新聞統籌專員嚟過喎，「專業」唔係統籌新聞嘅咩？
其實佢都有做同新聞相關嘅嘢，有時都要將對公眾發放嘅新聞稿外判畀公關公司撰寫，近幾個月就喺各報章霸地盤寫文，《頭條日報》、《都市日報》、《am730》都有專欄，提過「以唧牙膏方式來提問，這只是新聞包裝下的政治攻訐，侮辱了新聞專業」，但主要係幫梁特sell所謂政績、反駁下批評，但就被人話其實反而重新令人記返起梁特啲醜聞，仲間中撩起筆戰，又教人計梁特其實係收UGL 400萬英磅，唔係5000萬港元。
佢早前又撰文自行「釋法」，話宣誓時要求議員「擁護中華人民共和國香港特別行政區基本法」和「效忠中華人民共和國香港特別行政區」是誓詞中的關鍵，又稱任何人不願完整讀出「中華人民共和國」就已經有根本問題，仲講三權分立係僭建嘅概念。明白晒，原來呢啲就係新聞統籌專員嘅工作。
上屆立法會，泛民已經想透過財政預算案修正案，削減馮煒光年薪兼約滿酬金，但係有關修正案由議員提出，需經立法會分組點票，喺建制派佔多嘅功能組別護航下，佢當然冇事喇。