今年立法會選舉期間，唔少政界中、候選人嘅facebook、電郵都疑似被入侵，之後又發生有社運人士Telegram賬戶被疑似大陸黑客入侵，噚日又到青年新政兩名議員facebook及Telegram賬戶懷疑俾內地黑客搞，不過有IT界人士同八方講，其實facebook喺選舉後已加強保安，認為俾人入侵機會唔大。
梁頌恆噚日話，佢同游蕙禎facebook賬戶（圖）最近突然被人竄改密碼，Telegram賬戶仲有來自北京IP地址的登入紀錄，佢又話過去3星期，佢同游承受唔少壓力，包括被人跟蹤，但佢堅持自己做咗正確嘅事，甘願為此而承受。
有IT界人士對佢兩個facebook賬戶俾人入侵說法有懷疑，以佢所知自從立會選舉後，facebook已全面提升保安，包括將政治人物同立法會議員提升為認證用戶，必須提供真名同證件核實身份，亦會加強監察呢啲賬戶有冇不尋常活動。
所以如果梁、游嘅賬戶真係有俾大陸黑客搞，facebook方面一定會知，同埋會有行動保護賬戶阻止入侵，所以佢兩人facebook俾人入侵可能性真係好低。