5年前嘅今日就係區議會換屆選舉前夕，唐、梁二人嘅公開活動亦隨之減少，大家嘅焦點去到區議會選舉之上。為求上位不擇手段嘅梁振英就博出位，走出嚟呼籲市民投票，因為投票係市民嘅責任，仲話冇聽過中聯辦有區議會候選人嘅推薦名單，完美演繹佢嘅語言偽術。
梁振英當時話，佢無聽過有份咁嘅名單，相信市民對投畀邊位心中有數。梁振英真係詼諧，咪玩啦，中聯辦點會冇名單呀？冇名單又點配票呀？用番梁氏一貫語言偽術解讀，無聽過唔等於無睇過，無睇過亦唔等於唔知道，唔知道就唔代表名單唔存在。
至於佢話投票係市民責任，呢句啱呀，不過市民可以投票選區議員同立法會議員，不過就係唔可以投票選特首，呢筆點計呢？再者市民投完票選個議員出嚟，只要阿爺唔鍾意，文攻武鬥盡出，甚至釋法都仲得，總之就係要你冇得做，吹咩？